ಕಾರ್ಕಳ: ತಾಲೂಕಿನ ಮುಂಡ್ಕೂರು ಸಮೀಪದ ಸುಪ್ರಸಿದ್ಧ ಜಾರಿಗೆಕಟ್ಟೆ ಶ್ರೀ ಕೊರಗಜ್ಜ ಹಾಗೂ ಕೊರಗರ ಪಂಜುರ್ಲಿ ಕ್ಷೇತ್ರದ ಧರ್ಮದರ್ಶಿಗಳಾದ ದಿವಾಕರ್ ಪೂಜಾರಿ (60) ಅವರು ಕಾಸರಗೋಡಿನಲ್ಲಿ ದೈವ ದರ್ಶನದ ವೇಳೆ ಸಂಭವಿಸಿದ ಹೃದಯಾಘಾತದಿಂದ ಫೆಬ್ರವರಿ 15ರಂದು ವಿಧಿವಶರಾದರು.
ಜಾರಿಗೆಕಟ್ಟೆ ಕ್ಷೇತ್ರವನ್ನು ಇಂದಿನ ಉತ್ತುಂಗಕ್ಕೆ ತರುವಲ್ಲಿ ಅವರ ಪರಿಶ್ರಮ ಅನನ್ಯ. ಸಹಸ್ರಾರು ಭಕ್ತರ ಕಷ್ಟಗಳಿಗೆ ಸ್ಪಂದಿಸುತ್ತಾ, ದೈವದರ್ಶನ ಮತ್ತು ಸೇವೆಗಳಿಗೆ ಸೂಕ್ತ ಮಾರ್ಗದರ್ಶನ ನೀಡುತ್ತಿದ್ದರು.
ಜಾತಿ-ಮತ ಬೇಧವಿಲ್ಲದೆ ಹಿಂದೂ, ಕ್ರೈಸ್ತ ಮತ್ತು ಮುಸ್ಲಿಂ ಬಾಂಧವರು ಹರಕೆ ಸಲ್ಲಿಸುವಂತೆ ಕ್ಷೇತ್ರವನ್ನು ಸರ್ವಧರ್ಮ ಸಮನ್ವಯದ ಕೇಂದ್ರವಾಗಿ ಬೆಳೆಸಿದ್ದರು.
ಮುಂಡ್ಕೂರು ಪೊಸ್ರಾಲು ಬ್ರಹ್ಮಶ್ರೀ ನಾರಾಯಣ ಗುರು ಸಂಘದ ಅಧ್ಯಕ್ಷರಾಗಿ, ಸಂಘದ ನೂತನ ಕಟ್ಟಡ ನಿರ್ಮಾಣದಲ್ಲಿ ಅವರು ವಹಿಸಿದ ಪಾತ್ರ ಅವಿಸ್ಮರಣೀಯ.
"ಭಕ್ತರ ಸಂಕಷ್ಟಗಳಿಗೆ ಕಿವಿಯಾಗಿ, ದೈವಾರಾಧನೆಯ ಮೂಲ ಆಶಯವನ್ನು ಎತ್ತಿ ಹಿಡಿದಿದ್ದ ಅವರ ಅಗಲಿಕೆ ಅಪಾರ ಭಕ್ತವೃಂದಕ್ಕೆ ತುಂಬಲಾರದ ನಷ್ಟ." ಅಗಲಿದ ಚೇತನಕ್ಕೆ ಭಗವಂತನು ಚಿರಶಾಂತಿಯನ್ನು ನೀಡಲಿ ಮತ್ತು ಅವರ ಕುಟುಂಬಕ್ಕೆ ಈ ನೋವನ್ನು ಭರಿಸುವ ಶಕ್ತಿಯನ್ನು ಕರುಣಿಸಲಿ ಎಂದು ಪ್ರಾರ್ಥಿಸೋಣ.
-01.png)
